Документ № 4 Судебник 1550 г. (извлечение)

1. Суд царя и великаго князя судити боаром, и окольничим, и дворецким, и казначеем, и дьяком. А судом не дружити и не мстити никому, и посулу в суде не имати; також и всякому судье посулов в суде не имати.

2. А которой боярин, или дворецкий, или казначей, или дьяк просудится а обвинит кого не по суду безхитростно¹ или список подпишет и правую грамоту даст², а обыщется то в правду, и боярину, и дворецкому, и околничему, и казначею, и диаку в том пени³ нет; а истцом суд з головы, а взятое отдати.

3. А которой боярин, или дворецкой, или казначея, или дьяк в суде посул возьмети обвинит... не по суду⁴, а обыщется то в правду, и на том боярине, или на дворецком, или на казначеи, или на дьяке взяти исцов иск⁵ а пошлины царя и великого князя, и езд, и правда, и пересуд, и хоженое, и правой деся­ток и пожелезное взяти втрое, а в пене что государь укажет.

4. А которой дьяк список нарядит или дело запишет не по суду, не так как на суде было, без боярского, или без дворецкого, или без казначеева ве­дома, а обыщется то в правду, что он от того посул взял, и на том дьяке взяти перед боярином вполы да кинути его в тюрьму.

5. Подьачей, который запишет не по суду для посыла без дьячего приказу, и того подьячего казнити торговою казнью, бити кнутьем.(…)

26. А бесчестие⁶ детем боярским, за которыми кормлениа⁷, указати против доходу, что на том кормление по книгам доходу⁸, а жене его безчестья вдвое против того доходу; которые дети боарьские емлют денежное жалование, сколько которой жалованьа имал, то ему и бесчестие, а жене его вдвое против их бесчестна; а дьяком полатным и дворцовым безчестие что царь и великий князь укажет, а женам их вдвое против их бесчестна,... а торговым людем и посадцким людем и всем середним бесчестиа пять рублев, а женам их вдвое бесчестна против их бесчетиа; а боярскому человеку доброму⁹ бесчестиа пять рублев, опричь тиунов и довотчиков, а жене его вдвое; а тиуну бояр­скому или довотчику и праведчику¹⁰ бесчестиа против их доходу, а женам их вдвое; а крестианину пашенному и непашенному бесчестиа рубль, а жене его бесчестиа два рубля; а боярскому человеку молотчему¹¹ или черному городцкому человеку молодчему¹² рубль бесчестна, а женам их бесчестиа вдвое. А за увечие указывати крестианину, по смотря по увечию и по бесчестию; и всем указывати за увечие,посмотря по человеку и по увечью.(…)

61. А государьскому убойце, и градскому здавцу, и коромольнику, и церковному татю, и подметчику, и зажигальнику, ведомому лихому человеку, живота не дати, казнити ево смертною казнью.(…)

64. А детей боарьских судити наместником по всем городом по нынешним царевым государевым жаловалным волчим грамотам.(…)

72. А по городом наместником городских посадских всех людей промеж их судити обыскивая по их животом и по промыслом и по розмету¹³: сколке руб­лев кто цареву и великого князя подать дает, по тому их, обыскивая, судити и управа чинити. А розметныя книги старостам и соцким и десяцким и всем и людем тех городов своих розметов земского дьака руку за своими ру­ками ежегод присылати на Москву к тем боаром, и дворецким, их казначеем, и к дьаком у кого будут которые городы в приказе¹⁴; а другие книги розметные своих розметов старостам и соцким и десяцким тех городов, где кто жи­вет, отдавати тех городов старостам и целовалником, которые у наместников в суде сидят. И кто тех городов городцкие посадцкие люди учнут промеж се­бя искати много, не по своим животом, и про тех исцов сыскивати розметными книгами, сколко он рублев с своего живота подати дает; и будет жывота ево столко есть, на сколко ищет, ино ему дати суд; а будет жывота ево ско­лко нет, и тех исцов в их искех тем и винити, а пошлины имати по Судебнику, а пареве государево пене велети дати на поруку да прислати к Москве ко государю. А городцким посацким людем искати на наместникех к на их людех по своим же жывотом и по промыслам и по розмету.(…)

81. А детей боарьских служилых и их детей, которые не служивали, в холопи не приимати никому, опричь тех, которых государь от службы отставит...(…)

88. А крестианом отказыватись из волости в волостъ и из села в село один срок в году: за неделю до Юрьева дни до осеннего и неделя по Юрьеве дни осеннем. А дворы пожилые платит в поле рубль и два алтына, а в лесах, где десять връст до хоромного лесу¹⁵, за двор полтина и два алтына. А кото­рой крестианин за кем живет год да пойдет прочь, и он платит четверть двора; а два года пожывет, и он платит полдвора; а три годы поживет, и он платит три четверти двора; а четыре годы пожывет, и он платит весь двор, рубль и два алтына. А пожилое имати с ворот¹⁶. А за повоз¹⁷ имати з двора по два алтына; а опричь того пошлин на нем не имати. А останется у которого крестианна хлеб в земли, и как тот хлеб пожнет, и он с того хлеба или с стоачего даст боран¹⁸ два алтына; а по кои места была рож его в земле, и он подать цареву и великого князя платит со ржы, а боярьского дела ему, за кем жил, не делати. А попу пожылого нет, и ходити ему вон безсрочно воля. А которой крестианин с пашни продастся в холопи в полную, и он выедет безсрочно ж, и пожилого нет; а которой хлеб его останется в земле, и он с того хлеба подать цареву и великого князя дает; а не похочет подати платити, и он своего хлеба земленаго лишен.(…)

92. А которой человек умрет без духовной грамоты, а не будет у него сына, ино статок весь и земли взяти дочери; а не будет у него дочери, ино взяти ближнему от его роду.(…)

98. А которые будут дела новые, а в сем Судебнике не написаны, и как те дела с государева докладу и со всех боар приговору вершается, и те дела в сем Судебнике приписывати.(…)

Памятники русского права. Вып. 4. – М., 1956. – С. 232 – 261.